ASÍ gagnrýnir meint leynisamkomulag

Á fundi miðstjórnar ASÍ í dag kom fram hörð gagnrýni á vinnubrögð stjórnarflokkana. Þetta kemur fram í tilkynningu frá ASÍ. Þar eru vinnubrögð Álfheiðar Ingadóttur, þingkonu VG, gagnrýnd sérstaklega.

Í tilkynningu segir: „Þar kom fram [Á Alþingi í gær] að þegjandi samkomulag ríkti um að ríkisfyrirtæki héldu að sér höndum í virkjanamálum meðan rammaáætlun hefur ekki verið afgreidd á Alþingi. Það er ólíðandi að ríkisstjórn krefjist til þess af æðstu embættismönnum og forstöðumönnum ríkisstofnanna að þeir starfi ekki samkvæmt gildandi lögum. Það að í gildi sé eitthvert leynisamkomulag milli stjórnarflokkanna sem hér um ræðir þýðir í raun verkstopp og að meiriháttar fjárfestingar sem stjórnvöld hafa rætt um að væru í farvatninu hafi í reynd verið settar á ís fyrir alllöngu síðan. Slíkt sé ábyrgðaleysi í ljósi þess mikla atvinnuleysis og tekjusamdráttar sem hér hefur orðið."