Nubo vill borga 5 milljónir dala

Fyrirtæki Huang Nubo greiðir fimm milljónir bandaríkjadala, eða um 615 milljónir króna á núvirði, fyrir sextíu ára leigu á Grímsstöðum á Fjöllum, samkvæmt samningsdrögum. Þetta er þremur milljónum dollara minna en upphaflega var áætlað.

Í fréttum okkar í gær var fjallað um óbirt drög samninga milli Zhongkun Grímsstaða ehf., fyrirtækis Huang Nubo, og Gáf, einkahlutafélags sveitarfélaga á Norðurlandi.

Þar kom fram að nýting vatns, auðlinda í jörðu og jarðvarma væri takmörkuð við rekstur ferðaþjónustunnar, nema Gáf veiti heimild til undanþágu.

„Allt þetta er í raun og veru í samræmi við aðra samninga og þýðir ekki að við séum að afsala okkur réttindum sem slíkum því að sjálfsögðu verður greitt fyrir þetta afgjald. Þessu til viðbótar þá er það þannig að allt sem þarf að gera þarf ekki bara samþykki GáF heldur líka þess sem fer með skipulagsvaldið á svæðinu, sem er sveitarfélagið Norðurþing," segir Bergur Elías Ágústsson, stjórnarformaður GáF og sveitarstjóri Norðurþings.

Í samningi um leiguafnot kemur fram að Zhongkun Grímsstaðir ehf. greiðir leigu fyrir fyrstu 60 ár leigutímans, fyrirfram í upphafi samningstíma. Heildarupphæð greiðslu eru fimm milljónir bandaríkjadala „og verður greidd í íslenskum krónum miðað við besta fáanlega gengi skv. Fjárfestingarleið Seðlabanka Íslands þegar greiðsla fer fram."

GáF kaupir landið fjórum bændum og er kaupverð það sama, fimm milljónir bandaríkjadala „... og verður greitt í íslenskum krónum miðað við besta fáanlega gengi skv. fjárfestingarleið Seðlabanka Íslands þegar greiðsla fer fram og er áætlað um ISK 800.000.000, - ... „

Helmingur er greiddur við undirritum samnings, og helmingur ári síðar, í báðum tilvikum.

Samkvæmt gengi dagsins í dag er heildarupphæðin raunar um 615 milljónir. Bergur Elías vill ekki tjá sig um þessar upphæðir.

„Nei, það vill ég ekki gera enda eru þessir samningar ennþá í vinnslu þó að þeir séu komnir nokkuð langt og ég tel ekki tímabært að tjá mig um það sem stendur," segir Bergur.

Ráðherranefnd fjögurra ráðherra hefur nú til skoðunar hvort kaupin verða samþykkt. Fréttastofa leitaði eftir áliti þeirra á drögunum í dag en enginn vildi veita viðtal.

„Eins og staðan er í dag þá erum við bara að bíða eftir svörum frá ráðherranefndinni og ég á ekki von á öðru en að það berist mjög fljótlega," segir Bergur.