"Hvernig á að ákveða hver er geðfatlaður?“

Eva Bjarnadóttir, framkvæmdastjóri Geðhjálpar, er ánægð með að smálán til geðfatlaðra einstaklinga verði felld niður en telur þó að nýsamþykktar reglur smálánafyrirtækjanna veki upp áleitnar spurningar.

„Mér finnst fyrir það fyrsta frekar einkennilegt að taka bara fyrir lánveitingar til þessara tveggja hópa," segir Eva, en smálánafyrirtækin ákváðu bæði að hætta að lána geðsjúkum og unglingum undir 20 ára aldri.

Eva bendir á að geðfatlaðir séu í flestum tilvikum lögráða og fjárráða. Þeir eigi því að geta ákveðið hvernig þeir verja fé sínu. „Þetta er flókið því það er í raun og veru mannréttindabrot að taka fyrir þennan hóp um leið og maður myndi kannski ekkert sértaklega vilja að þessi hópur sé að taka umrædd lán," segir hún.

Eva viðurkennir að geðfatlaðir einstaklingar hafi lent í vandræðum með smálán. „En það er bara eins og margir aðrir," segir Eva.

Auk þess er annað sem vefst fyrir henni. „Hvernig ætla þau að ákveða hver er geðfatlaður og hver ekki?" spyr hún. „Það væri áhugavert að sjá hvernig þeir ætla að gera það. Ég held að það sé mjög flókið."

Að hennar mati væri rétt að skoða reglurnar í víðara samhengi áður en ráðist er í að útiloka geðfatlaða og unglinga frá þjónustunni.

Haukur Örn Birgisson, lögmaður Útlána, segir að það standi að sjálfsögðu ekki til að neita geðfötluðum um viðskipti, heldur að koma til móts við þá einstaklinga sem sækja um niðurfellingu lána.