Borgin samþykkir sölu á 49% hlut í Gagnaveitu Reykjavíkur

Borgarstjórn Reykjavíkur hefur gefið stjórn Orkuveitu Reykjavíkur umboð til að hefja undirbúning á sölu á allt að 49 prósent hlut í Gagnaveitu Reykjavíkur.

Gagnaveita Reykjavíkur var stofnuð sem einkahlutafélag árið 2007 og hefur síðan þá verið að fullu í eigu Orkuveitunnar. Gagnaveitan rekur gagnaflutningskerfi, meðal annars ljósleiðaratengingar.

Eigendanefnd OR hefur skilgreint kjarnastarfsemi fyrirtækisins í samræmi við aðgerðaráætlun þess og hefur hún nú verið samþykkt af öllum eigendum sem eru Reykjavíkurborg, Akraneskaupstaður og Borgarbyggð.

Haraldur Flosi Tryggvason, stjórnarformaður Orkuveitu Reykjavíkur, hefur lýst því yfir að hann vilji selja fyrirtækið til þess að rétta af bága stöðu OR sem hefur gengið í gegnum miklar aðhaldsaðgerðir eftir hrun og fjárhagslegar endurskipulagningu.