Útigangsmaður aftur staðinn að íkveikju á Selfossi

Lögreglan á Selfossi handtók seint í gærkvöldi karlmann, sem ítrekað hefur orðið uppvís að því bera eld að húsum og hlutum í bænum að undanförnu.

Nú er hann grunaður um að hafa kveikt í ruslakassa úr plasti,við veitingastaðinn KFC, en þar var búið að loka og starfsfólk farið. Mikinn reyk lagði upp úr kassanum þegar lögregla kom á vettvang og var kassinn farinn að bráðna. Lögregla beitti handslökkvitæki og síðan var slökkvilið kallað á vettvang.

Samkvæmt ábendingu vitnis var maðurinn handtekinn skömmu síðar og vistaður í fangageymslu. Hann var nýverið úrskurðaður í mánaðar gæsluvarðhald, en Hæstiréttur ómerkti þann úrskurð, þannig að honum var sleppt úr haldi.