Hafragrautsmaður veldur lögreglunni hugarangri

Ökumaður sem ók á gatnamótum Miklubrautar og Kringlumýrarbrautar í morgun sá hvar í bílnum við hliðina var karl um þrítugt og í aftursæti bifreiðarinnar var barn. Maðurinn var að borða graut undir stýri að sögn þess sem tilkynnti málið til lögreglu, en fullyrt var að um hafragraut hafi verið að ræða.

Lögreglan bendir á að það sé að sjálfsögðu ekki lögbrot að borða hafragraut enda sé hann bæði hollur og góður, en betra sé að gera það í eldhúsinu heima eða á kaffistofunni í vinnunni. Sama gildi um flest annað enda eigi ökumenn að hafa hugann við aksturinn þegar út í umferðina er komið. Lögreglan segist hafa upplýsingar um að ökumaðurinn hafi haldið áfram að borða grautinn sinn eftir að græna ljósið kviknaði og því hafi borðhaldið átt sér einnig stað meðan á akstrinum stóð.

Skráningarnúmer bílsins fylgdi ekki með tilkynningunni og því hefur lögreglan ekki náð að ræða við manninn með hafragrautinn. Maðurinn er hins vegar beðinn um að láta svona atvik ekki endurtaka sig enda geti það skapað hættu í umferðinni.