Íhuga gæsluvarðhaldskröfu á hendur brunamanni

Lögreglan á Selfossi íhugar að krefjast enn á ný gæsluvarðhaldsúrskurðar yfir manni, sem ítrekað hefur borið eld að húsum í bænum að undanförnu, eftir að hann reyndi enn einu sinni að kveikja í húsi í gærkvöldi.

Hann var handtekinn laust fyrir miðnætti, sterklega grunaður um að hafa kveikt í ruslakassa úr plasti,við vetingastaðinn KFC, en þar var búið að loka og starfsfólk farið. Mikinn reyk lagði upp úr kassanum þegar lögregla kom á vettvang og var kassinn farinn að bráðna og eldurinn að magnast. Lögregla beitti strax handslökkvitæki og síðan var slökkvilið kallað á vettvang, enda var kassinn alveg við húsvegginn.

Samkvæmt ábendingu vitnis var maðurinn handtekinn skömmu síðar og er nú vistaður í fangageymslu. Hann verður yfirheyrður þegar runnið verður af honum í dag. Maðurinn var nýverið úrskurðaður í mánaðar gæsluvarðhald, að kröfu lögreglunnar í Árnessýslu, en Hæstiréttur ómerkti þann úrskurð, þannig að honum var sleppt úr haldi.