Erlendar stúlkur í vanda

Tvær erlendar stúlkur hringdu kaldar og hræddar í Neyðarlínuna í kvöld. Þær gengu upp úr Hnífsdal fyrr í dag en týndust þegar rökkva tók.

Björgunarsveitin Ernir frá Bolungarvík sótti stúlkurnar í kvöld. Voru þær bæði kaldar og hræddar og ekki vissar um hvar þær voru staddar. Þó gátu þæt gefið upp númer á nálægum ragmagnsstaur sem gerði björgunarsveitinni kleift að staðsetja þær nokkuð nákvæmlega á Kistufelli í botni Súgandafjarðar.

Björgunarsveitin ók áleiðis að stúlkunum en komst ekki alla leið þar sem nokkuð er farið að snjóa í fjöll á svæðinu. Gengu björgunarmenn því í um hálfa klukkustund áður en þeir náðu til stúlknanna.

Þær voru báðar heilar á húfu en engu að síður kaldar. Fengu þær þurr föt og far til byggða.