Leyfa rækjuveiðar í Skjálfanda og Arnarfirði

Hafrannsóknarstofnun hefur lagt til að leyfilegt verði að veiða 400 tonn af rækju í Skjálfanda á þessu fiskveiðiári og 450 tonn í Arnarfirði. Hinsvegar verði áfram bann við rækjuveiðum í Ísafjarðardjúpi og Axarfirði.

Þetta eru niðurstöður úr árlegri stofnmælingu Hafrannsóknar á rækju á grunnslóð vestan og norðanlands, Í tilkynningu segir að stofnvísitalan í Skjálfanda sé svipuð og í fyrra en undir meðallagi í Arnarfirði.

Hinsvegar er vísitalan langt undir meðaltali í Ísafjarðardjúpi og þótt hún hafi hækkað töluvert í Axarfirði er rækjan þar mjög smá og mikið af ungrækju.