Um 600 manns á fundi Landsbjargar

Slysavarnafélagið Landsbjörg býst við að um 600 manns, víða að úr heiminum, verði viðstaddir alþjóðlegu ráðstefnuna Björgun á Grand hóteli Reykjavík um helgina, en þetta er ein af stærstu ráðstefnunum í björgunargeiranum í heiminum. Í tilkynningu sem barst frá Landsbjörg í morgun segir að hátt í 60 fyrirlestrar verði fluttir á ráðstefnunni. Víðir Reynisson, deildarstjóri almannavarnadeildar Ríkislögreglustjóra, flytur opnunarfyrirlesturinn. Í honum mun Víðir fjalla um hvort Íslendingar eru undirbúnir undir hamfarir sem geta orðið og hvort hægt sé að nýta þá reynslu sem þegar hefur safnast, t.d. í eldgosum síðustu áratuga og stórum jarðskjálftum.