Björgunarsveitin á forsíðu símaskrárinnar

Í dag var skrifað undir samkomulag þess efnis að næsta bindi Símaskrárinnar verði helgað sjálfboðaliðum Slysavarnafélagsins Landsbjargar. Forsíðan hefur á stundum verið heldur umdeild, meðal annars prýddi Egill Gilzenegger Einarsson forsíðuna í eitt skiptið. Þá myndskreytti Hugleikur Dagson forsíðuna um árið.

Undirbúningur er þegar hafinn vegna Símaskrárinnar sem kemur út vorið 2013. Ríflega fjögur þúsund Íslendingar eru virkir í björgunarsveitunum og gegna þær lykilhlutverki í öryggi og slysavörnum landsins.

Forráðamenn Já upplýsingaveitna töldu því afar viðeigandi að veita Slysavarnafélaginu Landsbjörg aðgang að kynningarmætti Símaskrárinnar en hún er prentuð í yfir 100.000 eintökum og er dreift um allt land.

Samstarf Slysavarnafélagsins Landsbjargar og Símaskrárinnar mun birtast með ýmsum hætti. Leitast veður eftir að bæta enn frekar þær slysavarnaupplýsingar sem fram koma í Símaskránni. Ennig verður þjóðinni gefið kostur á að taka þátt í því að sýna sjálfboðaliðum björgunarsveitanna þakklæti sitt en það verkefni verður kynnt nánar síðar.