Reyndi að ræna mann í Hafnarstræti

Lögreglan á höfuðborgarsvæðinu hefur haft í nógu að snúast í dag en alls komu sex þjófnaðarmál upp í dag.

Þannig komu tvö mál upp í sömu verslun í Lóuhóla og það með aðeins hálftíma millibili. Þá var lögreglan einnig kölluð til vegna hnupls í Hólshrauni, Kistumel og Skeifunni.

Á fjórða tímanum í dag var tilkynnt um mann í Hafnarstræti sem reynt hafði að ræna annan mann. Hann fór síðan í ólæsta bifreið og gramsaði þar í tösku. Maðurinn var handtekinn og færður í fangageymslu. Samkvæmt upplýsingum frá lögreglu var maðurinn afar ölvaður.