Átta á hraðferð og einn valt

Átta ökumenn voru teknir fyrir of hraðan akstur á Vestfjörðum í liðinni viku, þar af var einn stöðvaður í nágrenni Patreksfjarðar en sjö á Djúpvegi.

Eitt umferðaróhapp var tilkynnt til lögreglu sunnudaginn 2. september. Óhappið varð á Flateyrarvegi. Ökumaður virðist hafa misst stjórn af bíl sínum sem endaði með bílveltu utan vegar. Ökumaður og farþegi voru fluttir með sjúkrabíl á sjúkrahúsið á Ísafirði til skoðunar. Bifreiðin óökuhæf og flutt af vettvangi með kranabíl.

Skemmtanahald gekk nokkuð vel fyrir sig um liðna helgi og án teljandi afskipta lögreglu, þó var ein líkamsárás tilkynnt til lögreglu.

Lögreglan á Vestfjörðum vill benda ökumönnum á að taka sérstakt tillit til gangandi vegfarenda við grunnskólana. Þá vill lögregla líka benda ökumönnum og umráðamönnum ökutækja á að huga að ljósabúnaði ökutækja sinna fyrir veturinn.