Tillögurnar eru ný útfærsla af gömlu stjórnarskránni

Eiríkur Bergmann, stjórnlagaráðsmeðlimur, tekur nýjum tillögum Skúla Magnússonar og Ágústs Þórs Árnasonar til stjórnskipunarlaga fagnandi. Hann telur þó að tillögur þeirra séu í raun aðeins ný útfærsla af núverandi stjórnarskrá landsins.

„Strax árið 1944 var ákveðið að Íslendingar myndu setja sér sína eigin stjórnarskrá. Sú endurskoðun hefur nú loksins litið dagsins ljós með frumvarpi Stjórnlagaráðs. Pólitískur raunveruleiki okkar er sá að annað hvort verður byggt á tillögum Stjórnlagaráðs eða að áfram verður stuðst við gömlu dönsku stjórnarskrána með aðeins smávægilegum breytingum," segir Eiríkur.

Skúli og Ágúst birtu í dag heildstæðar tillögur til nýrrar stjórnarskrár og kölluðu „valkost í stjórnarskrármálinu".

Eiríkur fagnar innilega allri umræðu sem skapast um stjórnarskrármálið. „Það er frábært að fólk láti sig þetta mál varða," segir hann. Honum finnst hins vegar tillögur Skúla og Ágústs frekar íhaldssamar. „Þær eru svona bútasaumur við gömlu stjórnarskrána," segir hann.

Of langt gengið?

Skúli og Ágúst virðast telja stjórnlagaráð hafa gengið of langt í endurskoðun sinni. Hlutar af gömlu stjórnarskránni sem aldrei hafi valdið ósætti séu teknir í gegn og þeim gerbreytt. Það geti valdið óvissu. Þetta telja Skúli og Ágúst óþarft og setja fram hófstilltari breytingatillögu.

Eiríkur segir ekki rétt að stjórnlagaráð hafi gengið of langt. „Nákvæmlega sömu rök hefði einnig mátt færa fram þegar þýska stjórnarskráin var endurskoðuð eða jafnvel sú bandaríska á sínum tíma," bætir hann við. Honum finnst þetta því ómakleg gagnrýni á frumvarp stjórnlagaráðs.

Hann segir að breytingatillögur stjórnlagaráðs séu rækilega miðaðar við stjórnskipunarhefðir í nágrannalöndunum. Því muni ekki skapast umtalsverð óvissa enda hafi þegar fengist víðtæk reynsla af umræddum ákvæðum í löndunum í kringum okkur.

Þjóðaratkvæðagreiðsla

Eiríkur telur að tillögur Skúla og Ágústs séu vel fallnar til þess að skapa umræðu. Fráleitt væri hins vegar að ímynda sér að tillagan færi í þjóðaratkvæðagreiðslu eða eitthvað slíkt. „Neinei, með fullri virðingu fyrir störfum Skúla og Ágústs þá getur ekki bara hver sem er trommað með sínar tillögur í þjóðaratkvæðagreiðslu. Stjórnlagaráð var kjörið til að smíða frumvarp og því verður vitaskuld aðeins kosið um það frumvarp," segir hann.