Ef Alþingi ákveður annan kjördag verður að hlíta því

Innanríkisráðuneytið lítur svo á að þjóðaratkvæðagreiðslan sem auglýst var í vikunni um frumvarp stjórnlagaráðs til stjórnarskrár sé ekki ólögleg þó hún sé haldin 20. október. Ef hins vegar Alþingi ákveður annan kjördag þegar það kemur saman verður ráðuneytið að hlíta því.

Lögum samkvæmt þarf Alþingi að ákveða kjördag á þjóðaratkvæðagreiðslum. Innanríkisráðuneytið auglýsti í vikunni að þjóðaratkvæðagreiðslan yrði haldin 20. október og miðar þar við ályktun Alþingis frá því í vor um að atkvæðagreiðslan skyldi haldin „eigi síðar en 20. október". Í gær hófst utankjörfundaratkvæðagreiðsla.

Leiðarahöfundur Morgunblaðsins í gær sakar innanríkisráðuneytið um að hafa auglýst ólöglegar kosningar þar sem Alþingi hefur ekki enn ákveðið nákvæma dagsetningu. Því liggi ekki fyrir ákvörðun Alþingis sjálfs og þannig séu líkur á að kosningin muni ekkert gildi hafa.

Samkvæmt upplýsingum úr innanríkisráðuneytinu er þetta umdeilanlegt lögfræðilegt atriði. Innanríkisráðuneytið túlkaði ákvörðun Alþingis svo að óhætt væri að halda áfram undirbúningi fyrir kosningarnar miðað við 20. október, í það minnsta þangað til annað kemur í ljós. Ef Alþingi hins vegar ákveður annan kjördag þegar það kemur saman þá mun innanríkisráðuneytið hlíta því.

Það er fremur óheppileg staða, enda er utankjörfundaratkvæðagreiðsla hafin. Ef Alþingi ákveður aðra dagsetningu verður hún að öllum líkindum lýst ógild.