Fráleitt að birta laun fólks

„Við viljum bara vekja athygli á því hversu fráleitt það er að birta viðkvæmar persónuupplýsingar um laun hvers einasta manns á landinu," segir Davíð Þorláksson, formaður Sambands ungra sjálfstæðismanna. Félagið skorar á stjórnvöld og fjölmiðla að hætta að birta laun almennra borgara, líkt og tíðkast hefur síðustu ár.

Félagið hefur mótmælt framlagningu álagningarseðla. „Þetta eru þúsundir manna sem koma þarna fram - ekki bara æðstu embættismenn ríkisins," segir Davíð.

Þá gagnrýnir félagið að fjölmiðlar birti launin í sérstökum blöðum. „Engin rök standa til þess að tekjur sé birtar með þessum hætti. Vilji einhver halda því fram að almenningur eigi rétt á því að það sé á allra vitorði hvað einstaklingar greiða í sameiginlega sjóði, þá mætti með sömu rökum halda því fram að réttast sé að birta allar upplýsingar um bótagreiðslur til einstaklinga."

Í fréttatilkynningu frá SUS, sem send var fjölmiðlum í morgun, birtir félagið laun starfsmanna fjármálaráðuneytisins, ritstjóra, eiganda og fréttastjóra DV og eiganda og ritstjóra Frjálsrar verslunar.

„Þetta eru stjórnendur hjá skattayfirvöldum og þeim fjölmiðlum sem birta sérstök tekjublöð. Við teljum að það eigi ekki að birta lista yfir laun fólks án þeirrar samþykkis en það verður að telja að þetta fólk hafi lagt blessun sína yfir að þeirra laun verði birt með þessum hætti þar sem þau sáu ekkert því til fyrirstöðu að birta laun annarra."

Fréttatilkynningu SUS má sjá í viðhenginu hér fyrir neðan.