Missti stjórn á krossaranum og slasaðist

Karlmaður á þrítugsaldri féll um helgina af bifhjóli sínu við mótorkrossbrautina í Sandgerði og slasaðist á fæti. Slysið vildi til með þeim hætti að maðurinn hjólaði ofan í poll og missti við það stjórn á hjólinu. Hann var fluttur með sjúkrabifreið á Heilbrigðisstofnun Suðurnesja þar sem gert var að meiðslum hans.



Þá voru fjórir ökumenn staðnir að hraðakstri í umdæmi lögreglunnar á Suðurnesjum um helgina. Sá sem hraðast ók mældist á 146 kílómetra hraða á Reykjanesbraut þar sem hámarkshraði er 90 kílómetrar. Sekt við slíku broti nemur 130 þúsund krónum.

Annar mældist á 93 kílómetra hraða þar sem hámarkshraði er 50 kílómetrar á klukkustund. Sá má reiða fram 50 þúsund krónur í sekt.