Fíkniefnahundurinn Nelson kom upp um smyglið

Pólskir háskólamenntaðir karlmenn og einn leikskólakennari neita að hafa skipulagt umfangsmikið fíkniefnasmygl til landsins fyrr á þessu ári. Mennirnir eru ákærðir fyrir að smygla 8,5 kílóum af amfetamíni í sjampóbrúsum.

Mennirnir komu allir með flugi frá Varsjá í Póllandi í apríl síðastliðnum. Þeir sátu þó á víð og dreif um vélina, og sögðu fyrir dómara í morgun, að þeir hefðu ekki vitað af veru hvors annars. Þeir gengu á sitthvorum tíma í gegnum eftirlit tollgæslunnar. Tollvörður bað einn af mönnunum að setja tösku sína í gegnum gegnumlýsingartæki en ekkert athugavert fannst þar.

Stuttu síðar var annar af mönnunum stöðvaður af öðrum tollverði, þar sem fíkniefnahundurinn Nelson merkti að fíkniefni væru í töskunni. Sá kom fyrir dómara og sagðist hafa skoðað innihald töskunnar. Í snyrtitösku sem þar var, fann tollvörðurinn 750 gr. sjampóbrúsa, sem var mjög harður viðkomu. Hann sagði að við vigtun hafi brúsinn reynst vera um eitt kíló að þyngd - það hafi honum fundist óeðlilegt. Við nánari skoðun reyndist brúsinn vera fullur af amfetamíni.

Þegar þarna var komið við sögu kom tollvörðurinn, sem hafði skoðað fyrstu töskuna sem slapp í gegn, og sagði að innihald taskanna væri keimlíkt. Tollverðir fóru því fyrir utan flugstöðina til að athuga hvort maðurinn sem slapp í gegn væri þar ennþá.

Leigubílstjórar sem stóðu við leigubílaröðina sögðu að hann hafi farið upp í leigubíl ásamt öðrum manni. Tollvörðurinn hringdi því í leigubílstjórann sem staðfesti að tveir menn væru í aftursætinu hjá sér og þeir hefðu pantað akstur á Grand hótel í Reykjavík.

Lögreglan stöðvaði svo leigubílinn í Kópavogi, og voru mennirnir tveir handteknir. Þeir reyndust báðir vera með eins tösku og sá sem var upp á flugvelli í haldi tollvarða. Amfetamín var í þeim öllum, og allt var það í sjampóbrúsum.

Lögreglumaður sem kom fyrir dómara sagði að töskurnar þrjár hefðu allar verið mjög svipaðar. Nærbuxurnar í þeim væru allar af sömu gerð, sem og annar fatnaður. Þá hafi biblíur verið í þeim öllum.

Mennirnir gáfu skýrslu fyrir dómara í morgun með hjálp túlks. Þeir neituðu því allir að hafa skipulagt smyglið. Þeir hafi einungis fengið töskurnar afhentar í Póllandi og fengið skipanir frá ónafngreindum mönnum að koma þeim til Íslands.

Ástæðan fyrir því að þeir hafi slegið til hafi verið meðal annars fjárhagsvandræði og skjótfenginn gróði. Þeir hafi ekki getað hætt við vegna hótana frá skipuleggjendunum, en hótanirnar hafi meðal annars beinst að fjölskyldum þeirra.

Spurðir hvort að þeir hafi farið með töskurnar án þess að vita um innihald þeirra, sögðu þeir að þeir hafi fengið þau tilmæli að ekki mætti kíkja ofan í töskurnar og alls ekki tala um ferðina til Íslands við neinn.

Mennirnir koma allir frá litlum bæ í Póllandi þar sem tæplega sex þúsund manns búa. Tveir af þeim játuðu að hafa komið áður til Íslands, en það var síðasta sumar. Allir sögðu þeir sjá mjög eftir smyglinu og þeim liði rosalega illa að sitja í fangelsi.

Amfetamínið er undir meðaltali að styrkleika en pakkningarnar sem þeir voru með voru allar mjög svipaðar. Aðalmeðferð málsins heldur áfram í byrjun september, en ekki var hægt að taka skýrslu af öllum vitnum nú.

Þegar henni er lokið er það dómara að ákveða hvort þeir verða dæmdir fyrir smygl á 8,5 kílói af amfetamíni, það er að segja að hafa skipulagt innflutninginn, eða einungis fyrir það magn sem hafi fundist í farangri þeirra, eða um tvö og hálft kíló hver.