Sjóðheitur Jakob Örn sá um að afgreiða ecoÖrebro

Jakob Örn Sigurðarson fór á kostum í liði Sundsvall Dragons í kvöld er liðið lagði ecoÖrebro af velli, 80-92. Jakob Örn skoraði 30 stig í leiknum og gaf þrjár stoðsendingar.

Hlynur Bæringsson átti einnig góðan leik fyrir Sundsvall og skoraði 12 stig og tók 7 fráköst. Leikurinn var lengi vel í járnum en lokaspretturinn var eign Sundsvall.

Logi Gunnarsson skoraði 8 stig, tók þrjú fráköst og gaf þrjár stoðsendingar í 88-74 sigri liðs hans, Solna Vikings, gegn Uppsala Basket.

Helgi Már Magnússon skoraði 4 stig, tók 8 fráköst og gaf 4 stoðsendingar þegar lið hans, 08 Stockholm HR, tapaði á heimavelli, 79-85, gegn LF Basket.

Brynjar Þór Björnsson skoraði 10 stig og tók 3 fráköst fyrir Jämtland er það tapaði naumlega gegn Norrköping Dolphins, 81-83.