Jón Arnór sjóðheitur í frábærum sigri í Slóvakíu

Íslenska landsliðið í körfuknattleik vann frækinn útisigur, 75-81, gegn Slóvakíu í dag. Þetta var annar leikur liðsins í A-riðli fyrir undankeppni EM.

Íslenska liðið var án Pavel Ermolinskij, sem meiddist í upphitun, og Loga Gunnarssonar sem var veikur.

Strákarnir spiluðu þó vel í fyrri hálfleik og leiddu í hálfleik, 36-44.

Síðari hálfleikur byrjaði skelfilega en íslenska liðið fékk á sig 20 stig í röð og kom sér í vonda stöðu.

Strákarnir náðu þá í skóflurnar, mokuðu sig upp úr holunni og lönduðu frábærum sigri.

Jón Arnór Stefánsson var í sérflokki í íslenska landsliðinu í dag og skoraði 28 stig. Haukur Helgi Pálsson skoraði 16, Jakob Örn Sigurðarson 15 og Hlynur Bæringsson 13.