Stelpurnar hans Þóris misstu frá sér sigurinn á móti Suður-Kóreu

Norska kvennalandsliðið í handbolta missti frá sér sigurinn í 27-27 jafntefli á móti Suður-Kóreu í handboltakeppni Ólympíuleikanna í London. Suður-Kórea skoraði tvö síðustu mörkin í leiknum og náði í mikilvægt stig.

Suður-Kórea var fyrir leikinn búið að vinna góða sigra á Spáni og Danmörku en þær suður-kóresku voru jafnframt eina liðið í riðlinum með fullt hús. Norska liðið, ríkjandi Heims-, Evrópu- og Ólympíumeistari, tapaði naumlega fyrir Frakklandi í fyrsta leik en fylgdi því eftir með sigri á Svíum.

Suður-Kórea byrjaði betur, náði mest fjögurra marka forystu í fyrri hálfleiknum og var 15-13 yfir í hálfleik. Norska liðið vann fyrstu átta mínútur seinni hálfleiksins 6-2 og tók frumkvæðið í leiknum,

Noregur var þremur mörkum yfir, 26-23, þegar sex og hálf mínúta var eftir en Suður-Kórea vann lokakaflann 4-1 og tryggði sér jafntefli. Jöfnunarmarkið kom úr hraðaupphlaupi hálfri mínútu fyrir leikslok.

Örvhentu stelpurnar voru í aðalhlutverki hjá norska liðinu, Linn Jorum Sulland skoraði 11 mörk og Linn-Kristin Koren var með fimm mörk. Eun Hee Ryu, Jihae Jung og Hyobi Jo skoruðu allar sex mörk fyrir lið Suður-Kóreu.