Svíagrýlan enn í fullu fjöri á stórmótum

Íslenska karlalandsliðið í handbolta spilar í kvöld þriðja leik sinn á Ólympíuleikunum í London en strákarnir okkar hafa unnið góða sigra á Argentínu og Túnis í fyrstu tveimur leikjum sínum. Mótherjar kvöldsins eru Svíar sem hafa einnig unnið tvo fyrstu leiki sína.

Íslenska landsliðinu hefur gengið ágætlega með Svía undanfarin ár en þá erum við ekki að nefna til sögunnar leiki þjóðanna á stórmótum, það er á HM, EM eða Ólympíuleikum.

Það eru nefnilega liðin meira en 48 ár síðan að íslenska karlalandsliðið vann Svíþjóð í fyrsta og eina skiptið á stórmótum.

Ísland vann Svíþjóð 12-10 á HM í Tékkóslóvakíu 1964 en Svíar fóru alla leið í úrslitaleikinn á því móti.

Síðan þá hafa þjóðirnar mæst níu sinnum á stórmótum og Svíar hafa unnið í öll níu skiptin þar á meðal á ÓL í Los Angeles 1984, á ÓL í Seoul 1988 og á ÓL í Barcelona.

Leikir Íslands og Svíþjóðar á stórmótum:

HM 1961 - Svíþjóð vann 18-10

HM 1964 - Ísland vann 12-10

ÓL 1984 - Svíþjóð vann 26-24

HM 1986 - Svíþjóð vann 27-23

ÓL 1988 - Svíþjóð vann 20-14

ÓL 1992 - Svíþjóð vann 25-18

HM 1993 - Svíþjóð vann 21-16

EM 2000 - Svíþjóð vann 31-23

HM 2001 - Svíþjóð vann 24-21

EM 2002 - Svíþjóð vann 33-22

EM 2008 - Svíþjóð vann 24-19