Leik lokið: Ísland - Svíþjóð 33-32 | Svíagrýlan kveðin niður

Íslenska karlalandsliðið í knattspyrnu vann frækinn sigur á Svíum í A-riðli handknattleikskeppni Ólympíuleikanna í London í gærkvöldi. Loktölurnar urðu 33-32 Íslandi í vil sem hefur líkt og Frakkland fullt hús stiga að loknum þremur leikjum í riðlinum.

Svíarnir mættu betur stemmdir til leiks í kvöld og höfðu frumkvæðið framan af. Strákarnir okkar komust í fyrsta skipti yfir í stöðunni 9-8 og létu forystuna aldrei af hendi.

Staðan í hálfleik var 17-13 Íslandi í vil en mest varð forystan sjö mörk þegar Aron Pálmarsson, einn besti maður Íslands í leiknum, kom Íslandi í 27-20 en þá kviknaði á Svíum.

Jafnt og þétt unnu þeir upp forskot Íslands og minnkuðu muninn í eitt mark 32-31 þegar  hálf mínúta lifði leiks. Ásgeir Örn Hallgrímsson skoraði hins vegar tíu sekúndum fyrir leikslok og tryggði Íslandi sætan sigur.

Íslendingar voru þó heppnir að fá ekki dæmda á sig leiktöf tíu sekúndum fyrr þegar Ásgeir Örn fór ekki inn úr opnu færi í sókninni. Svíarnir voru mjög ósáttir við dómarana frá Makedóníu en margir dómara tvíeykisins orkuðu tvímælis í London í kvöld.

Sigurinn var sá fyrsti á Svíum á stórmóti í 48 ár eða síðan á HM í Tékkóslóvakíu 1964. Síðan höfðu Svíar haft betur í níu viðureignum þjóðanna á stórmótum þar til þeir lágu í valnum í gær.

Íslenska liðið mætir Frökkum annað kvöld en sigurliðið tryggir sér efsta sætið í riðlinum. Lokaleikur Íslands í riðlinum er svo gegn Bretum á mánudag.

Nánari umfjöllun og viðtöl frá blaðamanni Vísis á vellinum er handan við hornið.