Guðmundur Árni og félagar taka sæti AG Kaupmannahafnar

Evrópska handknattleikssambandið hefur tilkynnt að Bjerringbro-Silkeborg taki sæti AG Kaupmannahafnar í C-riðli Meistaradeildar Evrópu á næstu leiktíð. Sú ákvörðun kemur í kjölfar þess að AG var tekið til gjaldþrotaskipta.

Guðmundur Árni Ólafsson leikur með Bjerringbro-Silkeborg sem hafnaði í öðru sæti dönsku deildarinnar á síðustu leiktíð. Danska liðið leikur gegn Gorenje Velenje frá Slóveníu, Chambery frá Frakklandi, St. Petersburg frá Rússlandi auk Kielce frá Póllandi sem hornamaðurinn Þórir Ólafsson leikur með.

Metalurg, Haslum, Dinamo Poltava og Alpha HC Hard keppast um síðasta lausa sætið í C-riðli.