Alexander: Njótum ávaxta erfiðisins

Alexander Petersson átti frábæran dag eins og svo margir í íslenska landsliðinu í kvöld. Hann skoraði sex mörk úr jafn mörgum skotum og átti nokkur afar mikilvæg augnablik í leiknum.

Til að mynda skoraði hann síðasta mark Íslands í leiknum eftir að hafa stolið boltanum í vörninni. En hann átti miklu fleiri frábær tilþrif í leiknum sem reyndust mikilvæg í framvindu leiksins.

Hann var eins og alltaf hógvær í viðtali við Vísi eftir leik.

„Þetta var frábær leikur eftir frábæran undirbúning. Við höfum lagt svo mikið á okkur í allt sumar og nú getum við leyft okkur að njóta ávaxta erfiðisins," sagði Alexander.

„Við höfðum trú á okkur og þess vegna unnum við þennan leik. Núna gengur okkur vel en við megum ekki gleyma því að þetta er bara rétt að byrja."