Aron: Væri ekki til í að spila gegn vörninni okkar

Aron Pálmarsson var himinifandi með sigur íslenska liðsins á Frökkum í kvöld en hann skoraði alls fimm mörk í dag. Aron segir þó hættulegt hversu oft Ísland fær brottvísanir í leikjum sínum á þessu móti.

„Mér finnst við vera alveg með þá í fyrri hálfleik. En svo lendum við í vandræðum vegna brottvísanna og það er búið að vera okkur erfitt á þessu móti hversu oft við erum út af," sagði Aron.

„Það er hættulegt og erfitt gegn sterkum liðum. En við náðum að halda þetta út í dag."

Strákarnir spiluðu glimrandi góðan sóknarleik í dag gegn þessari ógnarsterku frönsku vörn. „Við náðum alltaf að opna vörnina. Við erum með marga frábæra leikmenn og mörg góð kerfi. Við höfum sýnt það í síðustu leikjum að þegar sá hluti leiksins gengur upp hjá okkur þá getum við nánast skorað að vild."

„Franska vörnin hefur oft verið sögð ein sú besta í heimi. Við náðum að yfirspila þá í dag og er ekkert nema gott um það að segja. Ég er mjög jákvæður og bjartsýnn."

Aron hrósaði einnig varnarleik íslenska liðsins - eins og eðlilegt er. Vörnin var frábær í dag.

„Ekki væri ég til í að spila á móti þessari íslensku vörn, eins og hún er í dag. Strákarnir eiga hrós skilið fyrir það."

„Við eigum nú einn leik eftir en við eigum sigurinn vísan í riðlinum. Við settum okkur markmið um að vinna riðilinn eins og Arnór sagði í viðtölum eftir síðasta leik."

„Málið er bara að við förum í hvern einasta leik til að vinna. Og það þýðir bara eitt."