Guðmundur: Enginn heppnissigur

Landsliðsþjálfarinn Guðmundur Guðmundsson gat vitaskuld ekki annað en verið ánægður með framnmistöðu sinna manna eftir sigur á Frökkunum í kvöld.

„Ég verð að játa að ég er mjög ánægður með leik liðsins og hvernig við náðum að spila, bæði í vörn og sókn. Hraðaupphlaupin voru frábær, markvarslan líka og er eiginlega alveg sama á hvaða sviði handboltans það var - við spiluðum mjög vel í kvöld."

„Þess vegna unnum við þennan leik í kvöld. Það var ekki út af heppni eða einhverju öðru slíku."

„Við byrjuðum gríðarlega vel en fengum nokkra brottrekstra á okkur undir lok fyrri hálfleiks og þeir gengu á lagið. Við vorum reyndar stundum of fljótir að skjóta á markið þeirra á þessum leikkafla."

„Svo í síðari hálfleik skiptust liðin á að leiða leikinn en þegar uppi var staðið fannst mér við eiga það skilið að vinna þennan leik."

Ólafur Stefánsson skoraði mikilvægt mark í lok fyrri hálfleiks, eftir að Frakkar höfðu skorað sex mörk gegn aðeins einu frá Íslandi og jafnað leikinn í fyrsta sinn.

„Markið hjá Ólafi var gríðarlega mikilvægt. Við tókum leikhlé fyrir þessa sókn og stilltum þessu upp og niðurstaðan var að þetta gaf okkur frábært mark í erfiðri stöðu."

Guðmundur segir nú mikilvægt að átta sig á því að handboltakeppnin á Ólympíuleikunum er löng og hvergi nærri lokið.

„Það er mikil ögrun fólgin í því að halda fullri einbeitingu allan tímann. Allir þjálfarar liða sem hafa tekið þátt í svona móti eru sammála um það að þetta sé eitt stærsta verkefni hvers liðs. Það þurfum við að gera það nú. Við leyfum okkur að fagna þessum sigri í kvöld en svo byrjum við að undirbúa okkur fyrir næsta leik."

Sjálfsagt eru Bretar ekki vongóður um sigur gegn Íslandi á mánudag en Guðmundur tekur öll sín verkefni alvarlega.

„Það dugir ekkert kjaftæði. Í þessari íþrótt er þess krafist að maður fari í öll verkefni af fullum krafti og við erum hingað komnir til að gera einmitt það."