Róbert: Stundum eins og vitleysingar

Ísland vann í dag öruggan sigur á Bretum en strákarnir lentu þó í alls konar basli framan af leik. Ísland var þó búið að tryggja sér sigur í A-riðli fyrir leikinn og hafði því að litlu að keppa í kvöld.

„Það var erfitt að „mótivera" sig fyrir þennan leik eins og sást í fyrri hálfleik," sagði Róbert við Vísi eftir leikinn í kvöld.

„Þetta er einmitt það sem við erum lélegastir í - þegar við erum langt um sterkari aðilinn dettum við oft á afturendann og í dag vorum við alveg skelfilegir í fyrri hálfleik. En þetta var svo aðeins betra í seinni hálfleik."

„Það sem gerist er að allir gefa um það bil tíu prósent eftir og þá er ansi mikið farið. Menn ætla sér ekki að gera svona lagað en stundum gerist það bara."

Róbert segir að leikmenn hafi ekki liðið vel þegar þeim gekk sem verst. „Við spiluðum stundum eins og vitleysingar og vorum sjálfum okkur til skammar. Ekki endilega út á við heldur gagnvart okkur sjálfum."

Síðari hálfleikur var mun betri af hálfu Íslendinga enda var farið vel yfir málin í búningsklefanum fyrir hann. „Við fengum bara vel að heyra það og menn vissu upp á sig sökina. Það þurfti bara að gefa aðeins meiri kraft í leikinn og þá kom þetta."

Ísland mun nú næst mæta Ungverjalandi í fjórðungsúrslitum keppninnar og mikið undir þeim leik komið.

„Það er leikurinn sem við höfum verið að bíða eftir. Þetta verður hörkuleikur og okkur hlakkar til að takast á við hann. Nú fyrst byrjar mótið af alvöru."