Snorri Steinn sá eini sem hvíldi í dag

Snorri Steinn Guðjónsson var eini leikmaður íslenska landsliðsins sem þurfti að hvíla á æfingu liðsins í Lundúnum í morgun.

Guðmundur Guðmundsson, landsliðsþjálfari, sagði þó í samtali við Vísi að Snorri væri betri í dag en í gær. „Við ákváðum að hvíla hann samt sem áður til að reyna að ná þessu endanlega úr honum," sagði Guðmundur.

Snorri Steinn hefur verið að glíma við slæma sinaskeiðabólgu en náði þrátt fyrir það að spila í 20 mínútur í sigurleiknum gegn Argentínu í gær.

„Það var ekkert ákveðið hvað hann myndi spila mikið. Við vonum bara að hann jafni sig á þessu svo við getum notað hann eins og þarf," bætti Guðmundur við.

Ingimundur Ingimundarson virtist hafa fengið slæma byltu í leiknum í gær en æfði þó af krafti í morgun. „Það er í góðu lagi með hann," sagði Guðmundur.

Ísland mætir Túnis klukkan 8.30 í fyrramálið og á Guðmundur von á erfiðum leik. „Þeir eru með þrælgott lið og það er alveg ljóst að við þurfum að vera á tánum."