Guðjón Valur um gjaldþrot AGK: Ég er í sjokki

Guðjón Valur Sigurðsson segir það vitaskuld afar slæmar fréttirnar sem bárust af gjaldþroti danska handboltafélagsins AGK nú í morgunsárið.

Félagið lýsti sig gjaldþrota í morgun og var það staðfest á heimasíðu liðsins af Jesper Nielsen, fyrrum eiganda liðsins.

Tilkynningin kom á meðan leik Íslands og Túnis stóð á Ólympíuleikunum í morgun og því hafði Guðjón Valur, sem lék með liðinu í vetur, ekki heyrt tíðindin þegar blaðamaður ræddi við hann.

„Ég er í sjokki," sagði hann og virtist vart ætla að trúa þessu. „Þetta er skemmtilegasta ár sem ég hef átt í handboltanum og þarna eru margir frábærir handboltamenn. Ég er gáttaður og veit ekki hvað ég á að segja."

Guðjón Valur er nú genginn til liðs við Kiel í Þýskalandi eftir ársdvöl í Danmörku. AG varð tvöfaldur meistari þar í landi annað árið í röð og komst í Final Four í Meistaradeild Evrópu.

Snorri Steinn Guðjónsson og Arnór Atlason voru samningsbundnir félaginu og Ólafur Stefánsson lék einnig með því í vetur en hann hafði ekki gert nýjan samning við liðið.

Snorri Steinn vildi ekki tjá sig um málið í samtali við Vísi eftir leikinn og þeir Arnór og Ólafur báðust undan viðtali.

„Það er mjög leiðinlegt að þetta verkefni skuli ekki hafa gengið eftir því það er all til alls þarna," sagði Guðjón Valur. „Það er leiðinlegt ef menn hafa spennt bogann of hátt. Dönsku leikmennirnir þarna eru algjörar goðsagnir og með bestu karakterum sem ég hef kynnst á ferlinum."

„Þetta tekur mig mjög sárt og er afar leiðinlegt að heyra."