Ingimundur: Vorum búnir að undirbúa okkur mjög vel

Ingimundur Ingimundarson sýndi ótrúlega frammistöðu í fyrri hálfleik Íslands og Túnis í morgun eins og aðrir varnarmenn íslenska landsliðsins.

Vörn Íslands fékk aðeins fjögur mörk á sig fyrstu 24 mínútur leiksins en á meðan þá gekk liðið allt á lagið og byggði upp forskot sem reyndist óyfirstíganlegt fyrir Afríkumeistarana frá Túnis.

„Við töluðum sérstaklega um það fyrir leik hversu illa okkur hefur gengið að byrja vel í síðustu þremur leikjum okkar [öllum gegn Argentínu]. Við lögðum því mikla áherslu á að byrja eins og ljón í dag og ég held að það hafi tekist mjög vel."

„Vörn og markvarsla var mjög flott hjá okkur. Við fengum ódýr mörk í kjölfarið sem gaf tóninn fyrir leikinn."

Guðmundur landsliðsþjálfari hafði orð á því fyrir leikinn að línumaðurinn Issam Tej væri stórhættulegur og mikilvægur hlekkur í liði Túnis. En Ingimundur klukkaði hann hressilega strax í fyrstu sókn og hann sást varla í leiknum.

„Við mættum þeim á æfingamótinu í Frakklandi og sáum þá svo spila gegn Svíum í gær. Við vorum því vel undirbúnir og búnir að kortleggja þeirra vinnu mjög vel. Sú vinna sem lagt var upp með fyrir leikinn gekk eftir."

Ingimundur hvíldi í seinni hálfleik en segist vera algjörlega heill heilsu. „Það er stutt á milli leikja og þarf af rúlla liðinu vel. Það er bara partur af þessu."