Guðmundur: Okkar bíður topplið

Guðmundur Guðmundsson reiknar með erfiðum leik gegn Svíum á Ólympíuleikunum annað kvöld. Svíar eru með fjögur stig eftir tvo leiki, rétt eins og Ísland.

Bæði lið hafa unnið Túnis en Ísland hefur þar að auki unnið Argentínu og Svíar lögðu Breta örugglega í gær.

„Svíarnir líta mjög vel út og hafa verið að spila vel. Þeir voru öflugir gegn Túnis og áttu svo léttan leik gegn Bretum," sagði Guðmundur.

„Það bíður okkar algjört topplið sem er með góða vörn og góða markverði. Ég er auðvitað glaður með sigurinn okkar á Túnis en við verðum að halda okkur á jörðinni enda mikið eftir af þessu móti."

Íslendingar gáfu nokkuð eftir snemma í síðari hálfleik gegn Túnis enda komnir fimmtán mörkum yfir. „Þá byrja menn að hugsa um næsta leik. Það eru ósjálfráð viðbörgð. Dómararnir fóru þá líka að hjálpa þeim og gáfu okkur nákvæmlega ekki neitt."