Knútur Hauksson: Ákvörðun Arons að fara til Þýskalands

Knútur Hauksson, formaður Handknattleikssambands Íslands, segir Aron Pálmarsson sjálfan hafa ákveðið að gangast undir læknisskoðun hjá Kiel í Þýskalandi. Það sé í fullri sátt við HSÍ.

„Þetta er í góðu við okkur. Við berum hagsmuni leikmannsins fyrst og fremst fyrir brjósti. Þetta er ungur strákur og við förum ekki að tefla á tvær hættur með hann," sagði Knútur í samtali við Vísi.

Læknar íslenska landsliðsins telja að Aron geti verið leikfær á Ólympíuleikunum sem settir verða á föstudag. Forráðamenn Kiel vilja hins vegar láta eigin lækna líta á Aron sem hélt utan í dag.

„Ef þeir (forráðamenn Kiel) vilja skoða hann frekar þá er það alltaf ákvörðun leikmannsins sjálfs. Hann hefur allan okkar stuðning í því. Þeir hafa auðvitað ungan og efnilegan leikmann og bera hag hans fyrir brjósti eins og við," segir Knútur og horfir til framtíðar varðandi vinstri skyttuna.

„Aron hefur náttúrulega um tvennt að hugsa. Hann vill auðvitað spila á Ólympíuleikunum en auðvitað einnig passa að allt sé í lagi. Hann þarf að horfa til framtíðar enda eru þetta vonandi ekki síðustu Ólympíuleikar hans," segir Knútur.

„Vonandi kemur í ljós að þeirra læknar verða sammála okkar læknum," segir Knútur sem reiknar ennþá með þátttöku Arons á Ólympíuleikunum.

„Já, staðan er óbreytt hvað það varðar," segir Knútur sem átti ekki heimangengt á landsleikinn í gær þar sem hann var utanbæjar.