Aron: Mjög mikill léttir

Aron Pálmarsson er kominn aftur á fullt skrið með íslenska landsliðinu - ekki seinna vænna enda aðeins tveir daga í fyrsta leik þess á Ólympíuleikunum í Lundúnum.

„Ég var að klára mína fyrstu æfingu þar sem ég gat verið með af fullum krafti og ég fann ekki fyrir meiðslunum. Það er mjög jákvætt," sagði Aron en viðtalið má sjá í heild sinni hér fyrir ofan.

„Það vantar kannski aðeins upp á snerpu og annað slíkt þar sem ég hef ekki getað æft lengi en ég verð þá bara duglegur að mæta í ræktina fyrir æfingarnar okkar. Þetta verður vonandi gott í öðrum eða þriðja leik."

Aron var kallaður út til Kiel í læknisskoðun á sunnudaginn en hann kom aftur til Íslands á mánudaginn. Landsliðið hélt svo til London á miðvikudag.

„Þetta var kannski fullmikið á stuttum tíma en þetta var eitthvað sem ég þurfti að gera. Ég lét mig hafa það og ég sé ekki eftir því núna."

„Ég var ekki ósáttur við þessa ákvörðun enda fékk ég góða meðferð hjá lækninum í Þýskalandi. En ég er þó búinn að vera svolítið þungur síðan við komum frá Frakklandi út af allri þessari dramatík í kringum mig. Það er aldrei gaman að lifa í óvissu, sérstaklega fyrir Ólympíuleika."

„Ég er því í skýjunum með að hafa getað æft með núna. Það er mikill léttir."