Ólafur: Þurfum að spila betur gegn Túnis

Landsliðsfyrirliðinn Ólafur Stefánsson segir að það hafi verið erfitt fyrir liðið að koma sér almennilega í gang í leiknum gegn Argentínumönnum í dag.

„Ég er ánægður með sigurinn en þetta var erfið fæðing í dag. En við eigum eftir að sjá þegar líður á mótið að Argentínumenn eru betri en þeir voru," sagði Ólafur.

„Auðvitað hefðum við viljað koma okkur í betri stöðu fyrr í leiknum en það var ekki fyrr en á síðustu tíu mínútunum að sigurinn var orðinn öruggur. Það var í raun of seint og verið að leika sér að eldinum."

Ólafur segir ágætan brag á liðinu eftir þennan fyrsta leik. „Maður er í meðvitundinni svolítið lengi og maður er alltaf að bíða eftir að eitthvað fari í gang hjá okkur. Við náðum ekki að detta almennilega inn í leikinn nógu snemma."

„Þetta gekk frekar hægt í dag. Við þurftum að sýna þolinmæði og vera jákvæðir. Við þurftum að treysta á að við myndu taka þá, hægt og rólega, og það var það sem gerðist."

Ísland mætir Túnis á þriðjudagsmorgun og segir Ólafur að það sé stórhættulegur leikur.

„Þeir eru líkamlega sterkir og miklu betra en nafnið gefur til kynna. Við þurfum að spila betur - það er nokkuð ljóst - og byrja leikinn á fullu."