Guðmundur: Andinn í höllinni stórkostlegur

Landsliðsþjálfaranum Guðmundi Guðmundssyni var greinilega létt eftir sex marka sigur Íslands á Argentínu á Ólympíuleikunum í Lundúnum nú í morgun.

„Fyrsti leikurinn á mótum er alltaf erfiður og þetta er ekkert venjulegt mót - þetta eru Ólympíuleikar," sagði Guðmundur.

„En þetta var fínt í dag. Við náðum að rúlla liðinu tiltölulega vel og þeir Snorri og Hreiðar áttu mjög góða innkomu í síðari hálfleik."

„Snorri hafði góð áhrif á sóknina. Þeir voru farnir að koma framarlega á okkur og þegar við byrjuðum að leysa inn á línuna og spila 4-2 þá gekk sóknin vel."

„Markverðirnir stóðu sig vel. Hreiðar var með frábæra innkomu í síðari hálfleik og flottur leikur hjá honum. Svo voru hraðaupphlaupin mjög góð."

„Við þurfum samt að laga það sem var ekki eins gott. Varnarleikurinn var mjög kaflaskiptur - náði sér stundum mjög vel á strik en datt svo niður á milli."

„Argentínumenn eru erfiðir. Þeir eru klókir og spila langar sóknir sem var erfitt að eiga við. Ég sagði við strákanna að við þyrftum að halda svakalegri einbeitingu til að láta þá ekki svæfa okkur."

Stuðningurinn sem íslenska liðið fékk í dag var frábær enda fjölmargir áhorfendur sem sóttu leikinn, þar af margir Bretar sem höfðu líklega aldrei séð handbolta áður. Þeir voru greinilega heillaðir af íþróttinni því þeir létu vel í sér heyra.

„Stuðningurinn sem við fengum var stórkostlegur og andinn í höllinni var sérstaklega góður - alveg meiriháttar. Bretar eru heillaðir af þessu sporti og það er smá handboltavakning í landinu og mér skilst á mönnum í breska handboltasambandinu að þeir eru mjög ánægðir þessa dagana."Guðmundur: Andinn í höllinni stórkostlegur