Langt í mikla timburframleiðslu

Það verður ekki fyrr en eftir um 20 ár að almennilegur skriður kemst á timburframleiðslu á Íslandi að sögn Brynjólfs Jónssonar, framkvæmdastjóra Skógræktarfélags Íslands. Brynjólfur er þó viss um að þegar fram líða stundir verði hægt að framleiða timbur á Íslandi. Það tekur hins vegar langan tíma.

Uppúr 1990 fór gróðursetning trjáa á Íslandi úr milljón trjám á ári upp í 6 milljónir. Tuttugu árum síðar fer að verða hægt að hafa töluvert af grisjunarviði af því. Grisjunarviður úr ungum skógum stendur hins vegar ekki undir mikilli timburframleiðslu. Þessir íslensku skógar verða því ekki að endanlegri afurð eða timbri fyrr en í kringum 2050. „Þetta tekur tíma," segir Brynjólfur „Þú getur ekki flett alvöru borðviði úr 20 ára gömlum grisjunarviði. Þú ert ekki að fá timbur fyrr en eftir 60-70 ár hér á Íslandi."

Upp úr 2030 verður komið nokkuð mikið af grisjunarviði í íslenskum skógum. Þá fer timburframleiðsla smám og smátt að glæðast á landinu. Þegar timburframleiðsla verður kominn af stað verður hún sjálfbær að mati Brynjólfs ef rétt verður haldið á spöðunum og haldið áfram að gróðursetja tré.

Í fréttum Ríkisútvarpsins í gær kom fram að brátt yrði hægt að framleiða þúsundir rúmmetra af timbri á Íslandi. Það er framleiðsla fyrir um milljarð króna á ári. Brynjólfur segir þetta rangt. Þó það sé gott að menn séu bjartsýnir í kreppum sé nokkuð langt þar til meiriháttar timburframleiðsla hefst á Íslandi.

Brynjólfur tekur hins vegar undir að skógar á Íslandi hafa vaxið óvenjuhratt á síðustu árum. Þann öra vöxt rekur Brynjólfur til veðurfarsins sem hefur verið mjög gott undanfarið eins og Íslendingar hafa ekki farið varhluta af.