Valitor þarf að opna greiðslugátt fyrir WikiLeaks

Valitor þarf að opna greiðslugátt fyrir Datacell og WikiLeaks innan fjórtán daga, ellegar greiða 800 þúsund krónur í dagsektir á hverjum degi. Þetta er niðurstaða Héraðsdóms Reykjavíkur sem kvað upp dóm sinn í dag.

Stærstu kortafyrirtæki heims, Visa og Mastercard, skipuðu þjónustuaðilum að loka á alla þjónustu fyrirtækja sem taka á móti greiðslu fyrir Wikileaks eftir að upplýsingasíðan lak þúsundum pósta úr sendirráðum Bandaríkjanna út um allan heim. Það er Datacell sem þjónustar WikiLeaks hér á landi og lokaði Valitor, umboðsmaður Visa á Íslandi, fyrir allar greiðslur.

DataCell og WikiLeaks stefndu Valitor vegna lokunarinnar og kvað Héraðsdómur Reykjavíkur upp dóm sinn nú eftir hádegi.