Gróf vanræksla á hryssu kærð - dýrið verður aflífað

„Þetta er algjört hirðuleysi, það er ekki í lagi að gera svona," segir Hjörtur Magnason, héraðsdýralæknir Austurumdæmis en hann fékk ábendingu í morgun um verulega vanhirta hryssu í umdæminu.

Um er að ræða nokkura ára gamla hryssu en hófar hennar hafa ekki verið klipptar í langan tíma og átti hryssan orðið erfitt með það að hreyfa sig. „Þetta var orðið mjög óþægilegt fyrir dýrið," segir héraðsdýralæknirinn.

Hjörtur fékk ábendingu í morgun um málið og leitaði strax staðfestingar á því. Eigandinn var fundinn og í ljós kom að dýrið var verulega illa farið. Spurður hvort það sé mögulegt að eðlilegar ástæður liggi þarna að baki, segir Hjörtur það af og frá, „það má vera að dýrið hafi fengið hófsperru, en þá þarf að kalla til dýralækni sem sinnir því. En þarna var ekkert gert," segir hann til útskýringar.

Því miður er þetta ekkert einsdæmi, „þetta er í þriðja skiptið sem svona tilfelli kemur upp hjá mér í sumar," segir Hjörtur.

Að sögn Hjartar er það ljóst að það þurfi að aflífa dýrið. Þá kærði Hjörtur málið til Matvælastofnunar, sem mun kæra eigandann áfram til lögreglunnar. „Miðað við dómafordæmin þá geta legið nokkuð háar sektir við þessu. Í öðrum löndum geta menn endað í fangelsi fyrir að gera svona lagað," segir Hjörtur.

Hann ítrekar að ef vegfarendur sjái hross sem eru illa á sig komin að hafa samband við yfirvöld. Þannig hafi hann fengið ábendingu um þetta hross, og er þakklátur fyrir. „Það er betra að láta vita heldur en að hneyklast yfir þessu og keyra svo áfram," segir Hjörtur að lokum.