Fréttu af leigjendunum fyrir nokkrum dögum

Talsmaður Dróma segir fyrirtækið hafa frétt af leigjendum og ástandi brunavarna í ósamþykktu íbúðarhúsnæði í Kópavogi fyrir nokkrum dögum. Eignin er í eigu fyrirtækisins en leigusamningur var gerður við fyrrum eiganda.

Fjórir fullorðnir og lítil stúlka voru hætt komin þegar eldur kom upp í ósamþykktu íbúðarhúsnæði að Vesturvör 27 í kópavogi í fyrrinótt. Húsnæðið hefur verið í eigu Dróma frá því í febrúar, en fyrrum eigandi gerði samning við aðila sem leigði húsið út. Ranglega var farið með það í kvöldfréttum í gær að Drómi hefði endurnýjað samninginn við eigandaskiptin en hann er þó enn í gildi og rennur út í ágústmánuði. Magnús Steinþór Pálmarsson er talsmaður Dróma.

„Í sjálfum sér hefur ekki verið tekin ákveðið um að rifta ekki, við fengum fyrst upplýsingar um hvaða aðili væri með húsið í heildarleigu af okkur síðasta föstudag og hittum hann núna á mánudaginn og fengum þá í rauninni þá fyrsta veður af því hvað er verið að gera með þessa eign," segir Magnús.

Eignin var yfirtekin með samkomulagi við eiganda á sínum tíma og því er leigusamningurinn enn í gildi.

„Við höfðum aldrei komið þangað inn og höfðum ekki hugmynd um hvernig ástatt væri með brunamál eða neitt annað varðandi þetta húsnæði enda er það svo nýkomið til okkar."

Magnús segir tilfellið ekki einfalt ef rifta eigi samningnum því oft þurfi að fara í útburð ef íbúar neita að fara.