Keflvíkingar búnir að semja við slóvenskan miðvörð

Slóvenski varnarmaðurinn Gregor Mohar mun spila með Keflavík í Pepsi-deild karla í fótbolta í sumar en hann skrifaði undir samning við félagið í dag. Þetta kemur fram í fréttatilkynningu frá Keflavík.

„Gregor hefur staðist væntingar og var ákveðið að gera við hann samning. Þetta er miðvörður sem kemur til með að styrkja leikmannahópinn okkar," segir í umræddri fréttatilkynningu.

Gregor Mohar er 180 sm miðvörður og fæddur árið 1985. Hann lék með slóvenska b-deildarliðinu NK Radomlje á þessu tímabili.

Keflvíkingar hafa áður fengið til sín sterkan leikmann frá Slóveníu en Alen Sutej, núverandi leikmaður FH, gerði góða hluti með Keflavíkurliðinu sumrin 2009 og 2010.