Helgi Már og félagar unnu toppliðið

Helgi Már Magnússon og félgagar í 08 Stockholm HR unnu dramatískan eins stigs heimasigur á toppliði Södertälje Kings, 68-67, í sænsku úrvalsdeildinni í körfubolta í kvöld.

Helgi Már átti fínan leik en hann var með 13 stig, 4 fráköst og 1 stolinn bolta. Helgi lék í 28 mínútur og hitti úr 4 af 7 skotum sínum.

Södertälje Kings var skrefinu á undan frá byrjun, leiddi 19-14 eftir fyrsta leikhlutann og var sjö stigum yfir í hálfleik, 37-30. 08 Stockholm kom muninum niður í tvö stig í upphafi fjórða leikhlutans og var síðan sterkara á æsispennandi lokamínútum.

08 Stockholm HR er samt áfram í áttunda og síðasta sætinu inn í úrslitakeppnina en Södertälje er jafnt Norrköping Dolphins á toppnum. Það gæti farið svo að þessi tvö lið mætist aftur í átta liða úrslitunum sem eru á næsta leiti.