Tré rifnuðu upp með rótum í Maryland

Stormurinn Sandy hefur valdið usla víða á austurströnd Bandaríkjanna. En áhrif hans eru þó ekki aðeins að finna á helstu hamfarasvæðum líkt og New Jersey og New York. Veðurofsinn hefur einnig haft mikil áhrif á höfuðborgina sjálfa, Washington, og stór svæði í Kanada.

„Já, það var hvasst fram eftir kvöldi en þetta virðist hafa gengið yfir núna," segir Kolbrún Kristjánsdóttir sem búsett er í Bethesda, rétt norðan við Washington. Kolbrún hélt sig innandyra í gærkvöld og nótt ásamt fjölskyldu og vinum er Sandy gekk á land.

„Það fór rafmagn af nokkrum götum hérna í nágrenninu," segir Kolbrún. Hún segir göturnar hafa verið auðar. Þá hafi tré rifnað upp með rótum í ofsaveðrinu.

„Við vitum til þess að eitt tré hafi fallið á hús. Þá var öllu lokað og allt gert til að halda fólki frá umferðinni. Það er mikið skóglendi hérna í Bethesda og þegar eitt tré fellur þá stoppar allt."

Kolbrún veit ekki til þess að einhver hafi slasast þegar tréð féll.

„Við erum hérna með Íslendinga í heimsókn sem ætluðu að versla, við verðum bara að bíða og sjá."

Eins og áður segir þá hefur óveðrið haft veruleg áhrif á daglegt líf á austurströnd Bandaríkjanna. En Sandy hefur einnig valdið usla í Kanada. Hátt í 150 þúsund manns eru án rafmagns í Ontario. Þá er einnig víða rafmagnslaust í Toronto, stærstu borg Kanada.