Fyrstu olíuvinnsluleyfin fyrir Drekasvæðið í pípunum

Fyrstu sérleyfin til olíuvinnslu í íslenskri lögsögu verða gefin út í næsta mánuði. Búist er við að tveir aðilar fái leyfi í fyrstu atrennu en Orkustofnun fresti útgáfu leyfis til þriðja umsækjandans þar til hann hefur tryggt sér reyndan erlendan samstarfsaðila.

Nærri fimm ár eru brátt liðin frá því íslensk stjórnvöld ákváðu að bjóða Drekasvæðið út til olíuvinnslu og nú hyllir undir þáttaskil þegar Orkustofnun gefur út fyrstu sérleyfin en það verður gert fyrir lok næsta mánaðar. Þrjár umsóknir hafa verið til skoðunar frá því í aprílbyrjun en þrír aðilar sóttu þá um leyfi í útboði númer tvö; Eykon Energy, Faroe Petroleum og Íslenskt kolvetni ehf. í sameiningu, og Valiant Petroleum og Kolvetni ehf. í sameiningu. Þessa þrjá hópa mynda þannig þrjú íslensk félög og tvö erlend.

Orkustofnun skýrði frá því í dag að drög að leyfum hefðu nú verið send umsækjendum til umsagnar en vill ekki svara því á þessu stigi hvort gert sé ráð fyrir að allir fái leyfi. Orkustofnun sagði í vor að við mat á umsóknunum þremur yrði tekið mið af rannsóknaráætlun, tæknilegri getu og reynslu og fjárhagslegum styrk umsækjenda.

Samkvæmt heimildum Stöðvar 2 hyggst stofnunin samþykkja tvær umsóknanna; frá Faroe og Íslensku kolvetni, og Valiant og Kolvetni, en setja umsókn Eykons í bið þar til félagið hefur tryggt sér samstarfsaðila sem stenst kröfur útboðsins um tæknilega getu og fjárhagslegan styrk.

Orkustofnun metur þannig að enska félagið Valiant ráði við olíuleit á Drekanum en það er nú þegar í olíuvinnslu í Norðursjó og í olíuleit við Noreg og Færeyjar og hafði 65 milljarða króna tekjur í fyrra. Skoska félagið Faroe Petroleum, sem upphaflega var stofnað í Færeyjum, telst einnig nægilega sterkt en það er í olíuleit og vinnslu í lögsögu Bretlands, Noregs og Færeyja, og hafði 16 milljarða króna tekjur í fyrra.

Heimildir Stöðvar 2 herma ennfremur að sérleyfin verði innan þess svæði í lögsögu Íslands sem Noregur á fjórðungsrétt á til nýtingar og verður norskum stjórnvöldum því boðið að ákveða hvort þau vilja ganga inn í sérleyfin.