Sviptur sjálfræði með ólöglegum hætti

Héraðsdómur Reykjavíkur dæmdi í dag íslenska ríkið til þess að greiða karlmanni miskabætur fyrir að hafa svipt hann sjálfræði.

Lögreglan var kölluð að heimili mannsins í desember árið 2007. Samkvæmt lögregluskýrslu bankaði lögregla ítrekað á hurð að herbergi mannsins eftir að nágranni hans hafði hringt og kvartað vegna ólyktar sem barst frá íbúð mannsins.

Lögreglumenn litu inn um glugga á herberginu og þá blasti við mikill blaðabunki um allt herbergið sem víða náði nánast að lofti.

Hvergi hafi verið hægt að stíga á gólf herbergisins fyrir dagblaðarusli og öðrum óþrifnaði. Lögreglumaður fór inn um glugga á herberginu til að athuga hvort manninn væri þar að finna en hann hafi engu svarað. Lögreglumaðurinn hafi skriðið ofan á kössum og blaðadrasli að hurðinni inn í herbergið. Þar hafi verið að finna laut í blaðadraslinu og í henni lá karlmaðurinn samkvæmt lýsingu úr dómi.

Maðurinn var afar ósáttur við afskipti lögreglunnar. Lögreglan lýsir því þannig að mjög erfiðlega hafi gengið að ræða við hann og hafi hann ekki svarað lögreglu af nokkru viti.

Hafi hann ítrekað reynt að loka herberginu svo lögreglan gæti ekki skoðað það. Ekki hafi verið hægt að kveikja ljós í herberginu, sem hafi verið heilsuspillandi, og ekki mannabústaður að mati lögreglumannanna. Læknir frá Héraðslæknisembættinu var þá kallaður á vettvang að beiðni lögreglu.

Eftir nokkrar viðræður við manninn tók læknirinn þá ákvörðun að svipta hann sjálfræði í 48 klukkustundir og færa manninn á geðdeild Landspítala.

Þar aftur á móti komust sérfræðingar að því að engin þörf væri á því að svipta manninn sjálfræði þar sem hann væri hvorki hættulegur sjálfum sér né öðrum.

Maðurinn var sviptur frelsi í tvær klukkustundir áður en sérfræðingar geðdeildar Landspítalans komust að annarri niðurstöðu.

Í niðurstöðu Héraðsdóms Reykjavíkur segir að ekki hafi verið sýnt fram á að maðurinn væri haldinn geðsjúkdómi sem réttlætti það að flytja manninn á sjúkrahús gegn sínum vilja. Er ríkinu því gert að greiða manninum 300 þúsund krónur í miskabætur.