Salvör: Nú er mikilvægt að ná sátt um breytingar

Formaður stjórnlagaráðs, Salvör Nordal, er sátt við niðurstöðu þjóðaratkvæðagreiðslunnar um tillögur ráðsins að nýrri stjórnarskrá. Hún telur mikilvægt að menn reyni nú að ná víðtækri samstöðu um þær breytingar sem óhjákvæmilega verða á nýrri stjórnarskrá.

„Frumvarpið okkar fær samkvæmt nýjustu tölum tvo þriðjuhluta atkvæða. Það hlýtur að teljast mjög góð niðurstaða," segir Salvör.

Hún telur að nú þurfi að rýna mjög vel í niðurstöðurnar og vonar að fólk komi ekki með neinar ótímabærar yfirlýsingar um næstu skref.

„Það kemur fram mikill vilji til breytinga í þessum kosningum. Breytingar á stjórnarskrá eru þess eðlis að það verður að vera um þær breið sátt að mínu mati. Eftir þessar kosningar finnst mér að allir verði að setjast niður og reyna að finna sameiginlega fleti um að ná sátt um breytingar," segir Salvör og vill að allir stjórnmálaflokkar komi þar að borðinu. Hún telur að það sé raunhæft markmið ef fólk vill stuðla að því.

Salvör Nordal var gestur í útvarpsþættinum Á Sprengisandi í morgun. Þar spjölluðu hún og Gunnar Einarsson, bæjarstjóri Garðabæjar um nýafstaðnar kosningar.

„Eftir þessar kosningar höfum við skoðanir fólks á erfiðum spurningum. Og þingið verður bara að taka sér taki, koma upp úr skotgröfunum og vinna að nýrri stjórnarskrá fyrir lýðveldið Ísland," segir Gunnar.

Nú þarf að túlka svörin

Salvör var í sínum tíma ekki sérlega hrifin af orðalagi fyrstu spurningarinnar, þ.e. hvort rétt sé að leggja tillögur stjórnlagaráðs til grundvallar að nýrri stjórnarskrá. Nú þurfi menn að velta fyrir sér hvað þetta í raun þýði. Að hennar mati er ekki nauðsynlegt að nota tillögurnar óbreyttar í heild.

„Ég held að miðað við þetta orðalag komi vel til greina að áfangaskipta verkinu að einhverju leyti. Taka brýnustu atriðin og reyna að ná víðtækri sátt um slíkar breytingar fyrir næstu þingkosningar," segir hún. Hún telur æskilegt að þeir sem hafi verið harðir á móti breytingum á stjórnarskránni brjóti nú odd af oflæti sínu og vinni að farsælum breytingum á þessum grundvallarlögum.

„Við þurfum að setjast yfir hvernig við getum látið alla þessa vinnu sem fram hefur farið verða farveg til nýs og betra samfélags," segir hún. „Nýtt Ísland fyrir mér eru ný og betri vinnubrögð. Að við virkilega gefum okkur t.d. tíma til að ná sátt um grundvallaratriði í okkar samfélagi. Og ég held að það hafi aldrei verið jafnbrýnt og núna."

Umræðurnar í heild má nálgast á hlekknum hér að ofan.