KR-ingar vilja ekki lána Ingólf í Pepsi-deildina

Ingólfur Sigurðsson staðfesti það við Íþróttadeild Stöðvar 2 að hann vilji losna frá KR sem allra fyrst. Ingólfur setti inn harðorða færslu á twitter-síðu sína í gærkvöldi þar sem hann ráðlagði ungum leikmönnum að halda sig frá KR. Ingólfur tók færsluna út tíu mínútum síðar en þá var hún komin út um allt.

Ingólfur er með samning við KR fram í október en hann er með ákvæði í honum sem gefur honum leyfi til að fara til erlends liðs. Ingólfur sagði í samtali við Íþróttadeildina að KR-ingar séu til búnir að lána hann til liðs í 1. deildinni en að þeir vilji ekki lána hann til annars liðs í Pepsi-deildinni.

Ingólfur segir að KR-ingar séu hræddir við að hann blómstri með öðru liði í Pepsi-deildinni en annars segir hann að KR-ingar séu brjálaðir út í hann fyrir að nota fjölmiðla til að koma óánægju sinni fram.

Ingólfur kom inn á sem varamaður á 82. mínútu í 3-2 sigri KR á Breiðablik í 1. umferð Pepsi-deildar karla en sat hinsvegar allan tímann á varamannabekknum í 1-1 jafnteflinu á móti Keflavík. Rúnar Kristinsson, þjálfari KR, notaði engan af varamönnum sínum í þeim leik.

Nánar verður fjallað um málið í kvöldfréttum Stöðvar 2.