Kleifarvatn að lifna við eftir mögur ár

Hér kemur ein skemmtileg veiðisaga úr Kleifarvatni. Gleðifréttir að veiðin sé að glæðast í þessu vatni og ræktunarátak klárlega að skila árangri. Hér fyrir mörgum árum var oft góð veiði í vatninu og þá sérstaklega í suðurendanum þar sem hverirnir eru. þegar vatnyfirborðið var hærra gekk bleikjan stundum inní pollinn í torfum og tók fluguna oft vel. Eftir skjálftahrinu sem olli því að yfirborð vatnsins lækkaði um nokkra metra datt allur botn úr veiðinni og vatnið verið lítið stundað síðan. En núna virðist líf færast í vatnið aftur.

En hér kemur sagan frá Ólafi Darra Hermannsyni og hann er hér með kominn í veiðipottinn sem við drögum úr 1. júní úr innsendum veiðifréttum.

"Við fórum tveir félagar úr Grindavík í stutt ferðalag yfir í Kleifarvatn. Ég hef reynt við þetta vatn hátt í 20 sinnum á síðustu 2 árum og hafði aldrei fengið fisk þarna. En við komum ferskir um hálf 2 leytið að hádegi í frábæru veðri og það var allt morandi í fisk. Reyndar frekar langt úti á vatninu en samt alveg slatti nálægt okkur líka. Stanslaust að koma upp og grípa flugur.

Við enduðum daginn með 8 fína fiska í heildina og misstum sitthvorn. Ég mína alla á þrjár mismunandi flugur en vinur minn sína á spún. Loksins sigraði ég Kleifarvatnið! Kominn tími til!"

Þið getið sent okkur veiðifréttir á kalli@365.is