Kvennahollin áttu vikuna í Langá

Langá var ansi þjáð af vatnsleysi í sumar í endalausum þurrkum en eftir að áin komst í gott vatn hefur veiðin heldur betur tekið við sér.

Heildarveiðin í ánni er 440 laxar en það endurspeglar engan veginn hvernig veiðin er enda hefur áin bara verið í þessu góða haustvatni í rétt 10 daga. Laxinn er farinn að dreifa sér vel um ánna en þó síst á efsta hlutann og þar eru nokkrir vinsælir veiðistaðir sem hafa bara ekki alveg tekið við sér í haust og má þar nefna t.d. Campari og Ármót. Aftur á móti er lax að taka mjög víða og það sem meira er, veiðitölurnar eru svipaðar og þær eru á hverju hausti þar sem vikurnar eru að skila 80-100 löxum. Síðasta vika gaf 90 laxa.

Þessi vika hefði getað verið mun betri í tölum ef það hefði ekki verið óselt holl á milli tveggja kvennaholla en bæði kvennahollin voru með 36 laxa hvort og þar af 12 maríulaxa saman. Það var mjög góð taka á flestum svæðum og flestar sem náðu laxi eða í það minnsta settu í lax. Takan er búin að vera mjög góð og það sem laxinn er að taka eins og á dæmugerðu hausti í Langá eru litlu flugurnar í stærðum 14-18#. Það er alveg ljóst að heildarveiðitalan verður ekkert til að hrópa húrra fyrir en þeir veiðimenn og veiðikonur sem hafa lagt leið sína í Langá á þessu hausti vita sem er að það er ekki hægt að kvarta yfir skorti á laxi þó það megi auðvitað alltaf vera meira.