Umfjöllun: Flugeldasýning hjá FH-ingum

FH-ingar vöknuðu af værum svefni í kvöld er þeir völtuðu yfir Grindavík, 7-2, í hreint út sagt ótrúlegum knattspyrnuleik. Spilamennska FH minnti á gamla góða FH-liðið en Grindvíkingar voru andlega fjarverandi.

Ballið byrjaði strax á 2. mínútu leiksins þegar Ray Anthony Jónsson sendi frábæra sendingu fyrir eigið mark á Atla Viðar Björnsson sem renndi honum í markið. Ótrúleg ákvörðunartaka hjá Ray og það versta sem gat komið fyrir lánlaust lið Grindavíkur.

Markið var upphafið að markaveislu sem Hafnfirðingar skemmtu sér konunglega yfir. Hálfleiksstaðan 5-1 en Grindvíkingar skoruðu úr sinni einu marktilraun í hálfleiknum.

Í síðari hálfleik þurftu FH-ingar ekki að hafa mikið fyrir hlutunum enda leikurinn unninn. Grindvíkingum til hróss sköpuðu þeir sér nokkur úrvalsfæri en þau skrifast líklega frekar á einbeitingarleysi í varnarleik Hafnfirðinga.

Lokatölurnar ótrúlegar, 7-2 og Hafnfirðingar litu virkilega vel út. Þó er erfitt að dæma þá af þessum leik enda virkuðu Grindvíkingar afar áhuga- og einbeitingarlausir. Því til stuðnings lögðu þeir upp jafnmörg mörk fyrir andstæðinginn og sjálfa sig.

Tölfræði

Skot (á mark): 18-10 (11-4)

Varin skot: Gunnleifur 2 – Óskar 4

Horn: 4-1

Aukaspyrnur fengnar: 7-12

Rangstöður: 4-0

Áhorfendur: 1493

Dómari: Kristinn Jakobsson 8